Producentja ukrainase e habitur me mikpritjen në Kosovë: Roja kufitare mu drejtua me fjalët “Lavdi Ukrainës”

Producentja ukrainase, Jeanne Dovhych, është shprehur e habitur me mikpritjen që i është bërë në Kosovë.

Ajo ka treguar se si në Aeroportin e Prishtinës “Adem Jashari”, një roje kufitare derisa ia ka dhënë pasaportën me vulë hyrjeje i është drejtuar me shprehjen “Slava Ukraina” (Lavdi Ukrainës).

“’A është hera juaj e parë në Kosovë?’ – më pyeti një roje kufitare në Aeroportin e Prishtinës. ‘Po, kjo është hera ime e parë këtu’. “Slava Ukraina!’ – më tha burri duke më kthyer pasaportën me vulë hyrjeje”, ka shkruar Dovhych në rrjetin social Twitter.

Tutje, ajo ka përmendur faktin që Ukraina nuk e ka njohur ende Kosovën, ndërsa anën tjetër, kjo e fundit ka hequr vizat për të gjithë shtetasit e Ukrainës.

Vendimi për heqjen e vizave për të gjithë shtetasit e Ukrainës që duan të vizitojnë Kosovën është miratuar në mbledhjen e Qeverisë së Kosovës të mbajtur më 9 mars të këtij viti.

“Me qëllim të solidarizimit me shtetasit ukrainas që po ballafaqohen me agresionin rus, propozojmë pezullimin e regjimit të vizave për shtetasit e Ukrainës”, pati deklaruar kryeministri Albin Kurti.

Ndryshe, edhe një deputet ukrainas po bënë përpjekje që vendi i tij të njeh shtetësinë e Kosovës.

Deputeti Oleksiy Goncharenko, ka dorëzuar në Kuvend një rezolutë për njohjen e pavarësisë së Kosovës.

“Kam dorëzuar në Parlamentin e Ukrainës një rezolutë për njohjen e pavarësisë së Kosovës. Ukraina ndan vlerat perëndimore dhe do të mbështesë demokracinë kudo në botë. Shpresoj se Ukraina do ta njohë pavarësinë e Kosovës sa më shpejt që të jetë e mundur”, ka shkruar ai në Facebook.

"Is this your first time in Kosovo?" – asks a border guard at the airport in Pristina.
Yes, this is my first time here.
"Slava Ukraini!" – says the man, returning me a passport with an entry stamp. Ukraine has not recognized Kosovo yet, but visas for Ukrainians have been canceled

— Jeanne Dovhych (@JDovhych) August 10, 2022