Albanian
Croatian
English
French
German
Serbian
Turkish
Pas Istogut, Ferizajt e Gjakovës, Listës “GUXO” i kanë dalë probleme edhe në Komunën e Kllokotit. Përfaqësuesi i Listës “GUXO” në këtë komunë, Nehat Rexhepi, në një prononcim për Gazetë Blic ka thënë se do të garojnë pa Lëvizjen Vetëvendosje.
Rexhepi ka deklaruar se zyrtarja e kësaj partie, Donika Gërvalla, i ka vendosur para aktit të kryer, pra nuk i ka pyetur nëse dëshirojnë të garojnë vetëm apo me Vetëvendosjen, e që sipas tij, këtu kanë filluar pakënaqësitë.
“Ne kemi vendosur që të garojmë vetëm në zgjedhjet lokale, pra iniciativa e Vjosës në komunën e Kllokotit në garën për Asamblist, kandidon e vetme pa asnjë parti tjetër. Unë mendoj që koordinatorët dhe degët e Listës ‘Guxo’ nëpër komuna kanë qenë para një akti të kryer. Ne nuk jemi pyetur fare, ata e kanë marrë vendimin vetëm, për këtë arsye ka pakënaqësi dhe do të shkojmë vetëm në zgjedhje”, thotë ai.
Ndryshe, udhëheqësja e Listës “Guxo”, Donika Gërvalla, ka deklaruar se në zgjedhjet lokale të 17 tetorit do të garojnë së bashku me Lëvizjen Vetëvendosje.
Në vazhdim e gjeni reagimin e plotë të Donika Gërvallës:
Të nderuar anëtarë, mbështetës dhe votues të Listës Guxo,Në zgjedhjet nacionale Lista Guxo ka garuar bashkë me Lëvizjen Vetvendosje dhe së bashku arritëm që me forcën e votës të bëjmë ndryshimin e pritur nga qytetarët e Kosovës. Prandaj jemi të bindur që garimi i përbashkët edhe në zgjedhjet lokale do të sjellë përfundimisht ndryshimin e shumëpritur në Kosovë.Prandaj Lista Guxo ka vendosur që në zgjedhjet e ardhshme komunale të marrë pjesë në lista të përbashkëta me Lëvizjen Vetvendosje. Kjo jo vetëm për arsye se Lista e Referendumit (VV + Guxo + Alternativa) arriti fitoren plebishitare në zgjedhjet e 14 shkurtit të këtij viti, por edhe sepse koalicioni ynë i përbashkët qeveritar ka dëshmuar se din dhe don ta bëjë ndryshimin e premtuar.Koalicioni synon shtetin ligjor e me mundësi të barabarta për të gjithë.Askush nuk ka të drejtë që në emër të Listës Guxo, në emër të frymës dhe konceptit të saj politik, të mbledhë vota me destinacion tjetër.Lista Guxo përfaqëson ndryshimin. Të gjithë ata që përqafojnë vizionin politik të Listës Guxo duhet të synojnë ndryshimin e premtuar rrënjësor në vend dhe jo të qenit patericë e koncepteve të tjera politike, të cilat në zgjedhjet e 14 shkurtit janë ndëshkuar rëndë nga qytetarët e vendit.Nryshimet që po vijnë në Kosovë do të krijojnë perspektivë më të mirë për të gjithë. Kjo nuk arrihet me ndarje të posteve shtetërore për militantë partiak, pa ekspertizë e kompetencë profesionale.Ata që ndihen të zhgënjyer për faktin që përzgjedhja në institucionet shtetërore tashmë bëhet në bazë të kritereve profesionale e jo duke shpërblyer militantë partiak, nuk e kanë kuptuar qartë mesazhin që votuesi kosovar dha në zgjedhjet nacionale.Njoftojmë anëtarët dhe simpatizantët e Listës Guxo se gjatë ditëve të ardhshme, së bashku me dy deputetët e Ferizajit të Listës Guxo dhe me mbështetësit dhe aktivistët e shumtë do të takohemi për t’u koordinuar rreth hapave të mëtejmë. Takime të tilla do të mbahen në të gjithë vendin.