Prishtina nesër nderon me homazhe Triumf Rizën, vendoset edhe gurthemeli për memorialin përkujtimor për policët e rënë

Më 30 gusht 2025, duke filluar nga ora 10:00, në lagjen Dardania të Prishtinës, do të mbahet ceremonia e homazheve pranë pllakës përkujtimore kushtuar zyrtarit policor Triumf Riza, i cili humbi jetën në krye të detyrës.

Ceremonia do të zhvillohet në vendin ku Triumf Riza ra heroikisht dhe do të përfshijë edhe vendosjen e gurthemelit të një memoriali të ri, që do të ndërtohet në nderim të tij dhe të të gjithë zyrtarëve policorë që kanë dhënë jetën në shërbim të vendit.

Në këtë ngjarje përkujtimore pritet të marrin pjesë figura të larta shtetërore, përfshirë kryeministrin në detyrë të Republikës së Kosovës, Albin Kurti, ministrin në detyrë të Punëve të Brendshme, Xhelal Sveçla, drejtori i Përgjithshëm i Policisë së Kosovës, kolonel Gazmend Hoxha, si dhe eprorë të lartë të Policisë së Kosovës.

Memoriali synon të jetë një simbol i përhershëm i sakrificës, guximit dhe përkushtimit të pjesëtarëve të policisë në mbrojtje të rendit dhe sigurisë publike.