Presidentja Osmani pret në takim gjeneralin Clark: Rrëfimi juaj për Kosovën duhet të vazhdojë të dëgjohet gjithandej botës

Presidentja e Kosovës, Vjosa Osmani e ka pritur sot në takim gjeneralin Wesly Clark, i cili udhëhoqi fushatën ajrore të NATO-s kundër forcave ushtarake të Millosheviqit.

Osmani gjatë takimit theksoi se Clark simbolizon vendosmërinë e botës demokratike  për të vënë në mbrojtje jetën e njerëzve.

“Ju simbolizoni vendosmërinë e botës demokratike për t’u vënë në mbrojtje të jetëve njerëzore, të jetëve të cilat po kërcënoheshin vetëm pse i takonin një etnie tjetër”, tha presidentja Osmani.

Komunikata e plotë nga Presidenca:

Presidentja shprehu kënaqësinë për ta mirëpritur mikun e Kosovës.

“Ju simbolizoni vendosmërinë e botës demokratike për t’u vënë në mbrojtje të jetëve njerëzore, të jetëve të cilat po kërcënoheshin vetëm pse i takonin një etnie tjetër”, tha presidentja Osmani.

Sipas saj, gjenerali Clark e gëzon mirënjohjen e përjetshme të popullit të Kosovës.

“Nuk do të jetë asnjëherë e mjaftueshme t’jua ritheksojmë mirënjohjen tonë për atë që ju bëtë për Kosovën në momentet më të vështira të historisë së saj”, tha ajo.

“Rrëfimi juaj për Kosovën duhet të vazhdojë të dëgjohet gjithandej botës”, tha presidentja Osmani.

Në anën tjetër, gjenerali Clark shprehu kënaqësinë që po rikthehet në Kosovë, aty ku mikpritja dhe mirënjohja për të janë të përhershme.

“Ky vend është krijuar falë shpirtit tuaj kryengritës dhe këmbëngultësisë së qytetarëve të këtij vendi për ta fituar lirinë”, tha gjenerali Clark.

Ai e ritheksoi gatishmërinë e tij që të vazhdojë ta përkrahë Kosovën sikur edhe deri më tani.