Presidenti i Haitit, Jovenel Moïse, u qëllua për vdekje nga një sulm i armatosur në rezidencën e tij.
Presidenti i Haitit, Jovenel Moïse, vdiq këtë të mërkurë në mëngjes në një sulm të armatosur në rezidencën e tij private, siç konfirmohet nga Kryeministri i përkohshëm Claude Joseph në një deklaratë, shkruan BBC.
Zonja e parë, Martine Moïse, e cila është shtruar në spital, gjithashtu u plagos në sulm.
Ngjara ndodhi rreth orës 1:00 të mëngjesit me kohën lokale, kur një grup individësh të paidentifikuar sulmuan shtëpinë e presidentit në Port-au-Prince, kryeqyteti i Haitit.
Jovenel Moïse, 53 vjeç, ishte në pushtet që nga shkurti 2017, kur ai zëvendësoi ish Presidentin Michel Martelly.
Mandati i Moïse ishte i trazuar. Ai u përball me akuza për korrupsion dhe u sfidua nga valët e protestave shpesh të dhunshme anti-qeveritare.
Në fillim të vitit, disa protesta tronditën kryeqytetin dhe qytete të tjera, me shumë njerëz që kërkonin dorëheqjen e tij.
Ky sulm vjen vetëm dy muaj para zgjedhjeve presidenciale, të thirrura për 26 shtator. Zgjedhje në të cilat Moïse nuk mund të ishte kandidat.
Presidenti i vrarë kishte kërkuar të njëjtën datë një referendum për të miratuar një Kushtetutë të re, një projekt që nuk kishte mbështetjen e opozitës ose të bashkësisë ndërkombëtare.
Opozita pretendoi se mandati pesë-vjeçar i Moïse duhej të kishte përfunduar në 7 shkurt, kur ishin pesë vjet nga fundi i qeverisë Martelly më 2016.
Moïse, megjithatë, insistoi që ai të qeveriste për një vit tjetër sepse ai nuk mori detyrën deri më 7 shkurt 2017.
“Vakumi” presidencial një vjeçar ishte produkt i akuzave për mashtrim elektoral, i cili përfundimisht çoi në anulimin e rezultateve të zgjedhjeve në 2015. Zgjedhjet e reja u fituan nga Moïse.
Moïse qeverisi me dekret që nga janari 2020, pasi vendi nuk ka parlament pasi, në tetor 2019, presidenti shtyu zgjedhjet parlamentare për dy vjet.