Policia nis hetimet për GPS-in e vendosur në veturën e Vehbi Kajtazit

Gjatë ditës së sotme gazetari kosovar Vehbi Kajtazi, bëri të ditur se i është vendosur një gjurmues GPS në veturën e tij, raporton Demos.

Gazetari publikoi edhe një video ku tregohej se bëhet fjalë për një GPS që shërben për gjurmimin e veturave apo automjeteve të tjera.

Zëdhënësi i Policisë së Kosovës Daut Hoxha bëri të ditur se për rastin Policia e Kosovës ka ndërmarrë menjëherë veprime.

“Është intervistuar gazetari në fjalë dhe këto informacione (edhe një pajisje/dëshmi që sipas informatave fillestare dyshohet të jetë GPS), janë duke u trajtuar në bashkëpunim me prokurorinë për të sqaruar rrethanat dhe dyshimet e tjera, përfshirë këtu edhe angazhimin e profesionistëve të Policisë së Kosovës që merren me trajtimin e mjeteve apo pajisjeve të dyshimta. Për mbarëvajtjen dhe rezultatet e hetimeve që po realizohen në bashkëpunim me prokurorinë, do te njoftoheni me kohe”, tha zëdhënësi i policisë Daut Hoxha për GazetaDemos.