Policia në Gjilan konfiskon 62 patentë shoferë gjatë muajit tetor

Policia e Kosovës ka bërë të ditur numrin e gjobave të shqiptuara për kundërvajtje gjatë muajit tetor në rajonin e Gjilanit.

Sipas njoftimit të Drejtorisë Rajonale të Policisë në Gjilan, Njësia Rajonale e Komunikacionit Rrugor dhe Stacionet Policore nga kjo drejtori, gjatë muajit tetor të këtij viti, në vazhdën e implementimit të planit operativ “Siguria në trafikun rrugor”, kanë realizuar aktivitete në zonën e përgjegjësisë që ka mbuluar shtatë komuna, shkruan lajmi.net.

Gjatë kësaj periudhe, policia ka bërë të ditur se janë shqiptuar 5 mijë e 922 gjoba për kundërvajtje të ndryshme në trafik.

“Njësiti Rajonal i Komunikacionit Rrugor gjatë këtij muaji në vazhdën e implementimit të planeve operative ,,Kontrolli teknik i jashtëzakonshëm i automjeteve’’ ka dërguar në Qendrat e Kontrollit Teknik shumë automjete dhe për automjetet të cilat me procesverbal nga këto qendra janë konstatuar me parregullsi teknike janë përjashtuar nga trafiku ku ndaj vozitësve të këtyre automjeteve janë ndërmarrë masa ligjore. Po ashtu kjo njësi gjatë këtij muaji ka implementuar edhe planin operativ ‘’Makineria bujqësore – Mjetet e punës’’ duke shqiptuar kundërvajtje ndaj vozitësve të mjeteve motorike bujqësore të cilët gjatë kontrollit kanë rezultuar se nuk janë duke qarkulluar konform rregullave të trafikut rrugor. Nga Njësia Rajonale e Komunikacionit Rrugor dhe Stacionet Policore të Drejtorisë Rajonale të Policisë Gjilan janë ndërmarr aktivitete edhe në: Hetim i gjashtëdhjetë e shtatë (67) aksidenteve të komunikacionit me dëme materiale, Hetim i gjashtëdhjetë e katër (64) aksidente të komunikacionit me të lënduar,Konfiskuar i gjashtëdhjetë e dy (62) patentë shofer”, thuhet në njoftimin e policisë.