Plani europian për Ukrainën, Meloni: I japim Kievit 10 miliardë euro

Komisioni Evropian njoftoi arritjen e një marrëveshje prej 2.3 miliardë euro në mbështetje të Ukrainës për ta ndihmuar atë të rindërtohet pas dëmeve të shkaktuara nga pushtimi në shkallë të plotë i Rusisë.

Fondet përfshijnë 1.8 miliardë euro në garanci kredie dhe 580 milionë euro në grante nga institucione financiare publike ndërkombëtare dhe dypalëshe, tha Presidentja e Komisionit të BE-së Ursula von der Leyen në një konferencë në Romë mbi planet për rindërtimin e Ukrainës. 2.3 miliardë eurot janë pjesë e Kornizës së Investimeve në Ukrainë, e cila von der Leyen tha se pritet të mobilizojë deri në 10 miliardë euro investime në Ukrainë.

Nga ana e saj, Kryeministrja e Italisë, Giorgia Meloni, njoftoi planin për një angazhim prej 10 miliard eurosh për Ukrainën.

”Sepse, pavarësisht nëse na pëlqen apo jo, ajo që ndodh në Ukrainë ndikon te secili prej nesh. Mendoj se kjo është arsyeja pse duhet të jemi krenarë për rezultatin që po arrijmë të gjithë së bashku sot: kombet, organizatat ndërkombëtare, institucionet financiare, autoritetet lokale, sektori i biznesit, shoqëria civile. Së bashku kemi marrë angazhime me konferencën e sotme për më shumë se 10 miliardë euro”, tha Giorgia Meloni, Kryeministre e Italisë.

Planin e rimëkëmbjes e mbështeti edhe Presidenti i Ukrainës, Volodymyr Zelenskyy.

“Ju kërkoj të mbështesni koalicionin e rimëkëmbjes dhe të ndihmoni në përcaktimin e mekanizmave specifikë të financimit. Ne duhet të biem dakord qartë që asetet e ngrira ruse duhet të shkojnë për rimëkëmbjen e Ukrainës. Jo vetëm të ardhurat nga këto asete, por edhe vetë asetet duhet të përdoren, dhe shumë më aktivisht sesa përdoren tani, për të ndihmuar në shpëtimin e jetëve. Ne gjithashtu kemi nevojë për një sistem të qartë për rindërtim, një fond të posaçëm rimëkëmbjeje dhe financim në nivele të ndryshme, për buxhetin kombëtar të Ukrainës dhe për komunitetet lokale”, deklaroi Volodymyr Zelenskyy, President i Ukrainës.

Konferenca për Ukrainën vjen në një moment kur qindra dronë rusë dhe më shumë se një duzinë raketash u drejtuan drejt Kievit, duke vrarë dy persona në sulmin e dytë masiv ajror brenda dy ditësh, ndërsa Ukraina kërkoi ndihmë kritike nga partnerët e saj në takimin në Romë.