Plagosja e gruas në Fushë Kosovë, nesër aksion simbolik para Policisë së Kosovës

Organizata joqeveritare Kolektivi për Mendim dhe Veprim Feminist nesër pritet të zhvillojë një aksion simbolik para stacionit të Policisë së Kosovës në Prishtinë, pas plagosjes së një gruaje të martën në Bresje të Fushë Kosovës.

Në një njoftim për media, bëhet e ditur se aksioni do të fillojë në orën 11:00.

“Ju ftojmë të na përcillni nesër në një aksion simbolik pranë stacionit policor në Prishtinë, duke filluar nga ora 11:00. Aksioni vjen si kundërpërgjigje ndaj tentim-vrasjes së një gruaje në Fushë Kosovë nga bashkëshorti i saj, i arrestuar dy ditë më parë për dhunë në familje. Urojmë të na bashkangjiteni,” thuhet në njoftimin e tyre.

Ndërkohë, gruaje e plagosur po vazhdon të trajtohet në QKUK.

Mjeku kujdestar Dr. Ejup Govori, ka dhënë detaje për gjendjen shëndetësore të gruas.

Govorit tha për Gazetën Demos se gjendja e gruas për momentin është stabile, ndonëse lëndimet janë serioze.

“Gjendja për momentin është stabile, lëndimet janë serioze dhe gjendja mundet të keqësohet për shkak se lëndimet janë në pjesët vitale të trupit edhe në gjoks”, deklaroi Govari.

Kurse nga Policia Rajonale në Prishtinë, kanë thënë se për këtë rast tashmë është arrestuar i dyshuari.

“Sot rreth orës 07:30 policia ka marrë informatën për një plagosje me armë zjarri të ndodhur në Bresje- Fushë Kosovë. Personi i plagosur (femër) është dërguar për tretman mjekësor. Lidhur me këtë rast policia ka arrestuar një person të dyshuar, ndërkohë që hetuesit policor në koordinim me prokurorinë, po ndërmarrin  veprimet hetimore për ndriçimin e plotë të rastit.” ka thënë Flora Ahmeti.