Drejtori i së ashtuquajturës zyrë për Kosovë, Petar Petkoviq, ka folur lidhur me vendimin për shpronësimin e tokës në komunën e Leposaviqit.
Sipas Kosovo Online, duke thënë se Kurti e ka uzurpuar tokën ilegalisht me vendim të njëanshëm, Petkoviq ka shtuar se ky vendim është marrë me qëllim të shkaktimit të tensioneve e krizave të reja në terren.
“Sot, Albin Kurti, me makineri të rëndë dhe polici speciale, ka filluar punimet ilegale në tokën serbe në komunën e Leposaviqit, konkretisht në fshatrat Dren dhe Leshak, të cilat i ka uzurpuar ilegalisht më 16 janar me një lloj vendimi të njëanshëm për shpronësim. Në fshatin Zaselje, sot në mëngjes, përfaqësuesit e Kurtit kanë filluar punën për zgjerimin e rrugës që të çon nga rruga kryesore në majën e kodrës, me shpronësim të paligjshëm,”- thuhet në njoftimin e së ashtuquajturës zyrë për Kosovë.
Ndër të tjera bëhet e ditur se Petkoviç ka theksuar se për këtë “uzurpim të tokës”, ai i ka njoftuar drejtpërdrejt të gjithë përfaqësuesit ndërkombëtarë, si dhe ndërmjetësuesin e BE-së për dialog, Miroslav Lajçak.