Policia e Kosovës përmes një njoftimi bëri të ditur se ka realizuar një operacion policor me urdhër të Gjykatës Themelore të Prishtinës, përcjell Gazeta Demos

Sipas njoftimit të Policisë në këtë operacion janë kryer një seri kontrollesh në 4  lokacione të ndryshme,

“Gjatë operacionit policor, janë kryer kontrolle në katër lokacione të ndryshme në Kosovë. Urdhri për kontroll është lëshuar bazuar në kërkesën përmes Ndihmës Juridike Ndërkombëtare të autoriteteve zvicerane”, tha policia.

Më tej nga Policia u bë e ditur se cak i operacionit ka qenë gjetja e provave materiale për disa kosovarë që dyshohet se përmes sistemeve kompjuterike kanë mashtruar zviceranë.

Njoftimi i plotë nga Policia e Kosovës:

Policia realizon operacion policor për realizim të Ndihmës Juridike Ndërkombëtare

Prishtinë, më 8 gusht 2023

Policia e Kosovës, përkatësisht Drejtoria e Hetimit të Krimeve Kibernetike, dhe Prokuroria Speciale e Republikës së Kosovës, në kuadër të bashkëpunimit ndërkombëtar dhe me prezencën edhe të autoriteteve zvicerane, sot kanë realizuar një operacion policor për zbatimin e urdhrit të Gjykatës Themelore Prishtinë – Departamenti Special.

Gjatë operacionit policor, janë kryer kontrolle në katër lokacione të ndryshme në Kosovë. Urdhri për kontroll është lëshuar bazuar në kërkesën përmes Ndihmës Juridike Ndërkombëtare të autoriteteve zvicerane.

Rasti ka të bëjë me disa të pandehur ndaj të cilëve autoritetet zvicerane janë duke zhvilluar procedurë penale me dyshimin se të pandehurit kanë kryer apo janë të përfshirë në vepra penale të mashtrimit përmes sistemeve kompjuterike, ku të dëmtuarit janë personat që jetojnë në Zvicër.

Gjatë këtij operacioni janë sekuestruar prova relevante, rasti është ende në proces hetimor dhe bashkëpunimi ndërmjet autoriteteve do të vazhdojë për trajtim të mëtutjeshëm të rastit. /Gazeta Demos/