Përfundon takimi Bislimi-Sorensen-Petkoviq, Serbia insiston në formimin e Asociacionit

Kryenegociatori i palës serbe në dialog, Petar Petkoviç, pas përfundimit të takimit trelateral mes tij dhe kryenegociatorit të palës kosovare, Besnik Bislimit, nën ndërmjetësimin e të dërguarit të Bashkimit Evropian për dialogun, Peter Sorensen, në një prononcim për media, ka potencuar se gjatë takimit ka insistuar në formimin e Asociacionit të Komunave me Shumicë Serbe.

“Ne insistuam në formimin e Asociacionit, në deeskalim dhe në ndalimin e përndjekjes së popullit serb”, ka potencuar ai.

Petkoviç njoftoi se gjatë takimit është diskutuar edhe për çështjen e personave të zhdukur, duke konfirmuar pjesmarrjen e palës serbe në një takim të një grupi punues për këtë çështje, që pritet të mbahet në Gjenevë të Zvicrës.

“Nga ana jonë kemi konfirmuar pjesëmarrjen në takimin e Grupit Punues në Gjenevë më 26 qershor, me ç’rast tregojmë gatishmërinë e plotë për të zgjidhur këtë çështje humanitare të rëndësishme për familjet e të zhdukurve“, ka njoftuar ai.