Përfundon operacioni i Krimeve Kibernetike, policia jep detaje

Ka përfunduar aksioni i krimeve kibernetike me ç’rast nën pranga kanë përfunduar 10 persona të dyshuar, raporton GazetaDemos.

Rastin e kanë konfirmuar Policia e Kosovës nëpërmejt një komunikate ku kanë dhënë detaje nga ky aksion.

“Gjatë operacionit policor të sotëm janë arrestuar 10 të dyshuar nën dyshimin se janë përfshirë në veprat penale: ‘lëshimi i çeqeve pa mbulesë ose të rremë dhe keqpërdorimi i kartelave të bankës apo të kreditit’ dhe ‘hyrje në sistemet kompjuterike’”, bëhet e ditur nga Policia e Kosovës.

Policia bën me dije se në këtë operacion janë kryer bastisje në 14 lokacione të ndryshme, në shtatë qytete të ndryshme të Kosovës

“Policia e Kosovës për të kompletuar të dhëna e dëshmi rreth rastit, ka kryer kontrolle në 14 lokacione në qytetet: Prishtinë, Gjilan, Ferizaj, Kaçanik, Drenas, Suharekë dhe Deçan”, ka njoftuar policia.

Sipas policisë të dyshuarit kanë qënë duke u hetaur qe disa muaj.

“Hetuesit policorë kanë zhvilluar veprime hetimore për një periudhë disa mujore, nën dyshimin se disa persona janë përfshirë në veprimtari penale. Veprimet policore janë kryer në koordinim më Prokurorinë e Shtetit”, thuhet në komunikatën e Policisë së Kosovës.

Të dyshuarit në bashkëveprim me njëri-tjetrin kanë tërhequr para në bankomate me kartela në mënyrë të paautorizuar, duke dëmtuar bankat kosovare në vlerë prej mijëra euro.

“Të dyshuarit, në bashkëveprim me njëri-tjetrin, me qëllim të përfitimit të kundërligjshëm të dobisë pasurore për vete apo për personin tjetër, kanë përdorur kartelat bankare pa autorizim duke bërë transaksione, tërheqje të parave nga bankomatët dhe blerje të gjësendeve të ndryshme, me kartela bankare të cilat kanë arritur në forma të ndryshme t’i komprometojnë. Në këtë rast janë dëmtuar institucionet financiare (bankat) në Kosovë me mijëra euro”, thuhet në komunikatë.

Të dyshuarve u janë sekuestruar komjuterë, telefona, USB, kartela bankare, dokumente dhe armë e municion.

“Policia ka sekuestruar prova të ndryshme relevante, përfshirë kompjuterë, telefona celularë, USB, kartela bankare, dokumente, si dhe tre armë dhe municion”, njofton policia./GazetaDemos/