Pensionohet mësimëdhënësi Musa Kransiqi, Selca: Faleminderit për dijen, për durimin e shembullin jetësor

Është pensionuar mësimëdhënësi disa vjeçar i lëndës së fizikës, Musa Krasniqi, i cili për vite me radhë dha kontribut të jashtëzakonshëm në edukimin e gjeneratave të vendit.

Për të ka shkruar kolegu e bashkëvendasi i tij, Florent Selca, i cili ia njohu punën e madhe, duke ia kujtuar vyrtytet e larta njerëzore.

“Sot, me ndjenja të përziera respekti dhe mallëngjimi, përcjellim në pension një njeri të veçantë – Musa Krasniqin. Një mësimdhënës i përkushtuar i lëndës së Fizikës, një njeri i urtë, i dashur dhe i pathyeshëm në karakter. Edhe pse po del në pension dy vite më herët, trashëgimia që lë pas në mendjet dhe zemrat tona është e pakohë”, tha ai.

Teksa kujtoi bashkëpunimin me Kransiqin, ai tha se “Musën e kam njohur nga afër në tri etapa të ndryshme të jetës: fillimisht si nxënës i tij, më pas si bashkëfshatar dhe së fundi si koleg pune. Në secilën prej këtyre roleve, ai ka dëshmuar dinjitet, profesionalizëm dhe shpirt të lartë njerëzor.

Gjatë kohës së luftës, Musa nuk u tërhoq para rrezikut. Ai iu bashkua radhëve të Ushtrisë Çlirimtare të Kosovës, duke dhënë kontributin e tij për lirinë tonë të përbashkët. Për këtë qëndrim atdhetar, ai u arrestua dhe u burgos nga armiku – por nuk u thye. Shpirti i tij mbeti po aq i fortë sa më parë, dhe ai kurrë nuk reshti së besuari në të mirën dhe në drejtësinë”, tha Selca.

I njëjti shprehu mirënjohje e falënderim për Krasniqin.

“Sot, kur e shohim duke mbyllur një kapitull të jetës së tij, ne nuk i themi lamtumirë, por faleminderit. Faleminderit për dijen, për durimin, për fjalën e urtë dhe për shembullin jetësor që na ka dhënë. Rrugëtimi yt ka qenë i pasur dhe i ndritur – dhe do të mbetet udhërrëfyes për brezat që vijnë.

Uroj që vitet në vijim t’i kalosh në shëndet, qetësi dhe lumturi, ashtu siç e meriton një njeri që ka dhënë aq shumë për të tjerët”.