PDK sot mban Konventën e Përgjithshme, Krasniqi kandidati i vetëm për kryetar

Sot, Partia Demokratike e Kosovës do të mbajë Konventën e Përgjithshme, ku do të zgjedhë kryetarin e ri të partisë. Memli Krasniqi është kandidati i vetëm për këtë pozitë.

Mediat do të kenë mundësinë të ndjekin fjalimin hyrës të Krasniqit, si dhe pas mbylljes së Konventës, do të mbahet një konferencë për media.

“Nën udhëheqjen e Kryetarit Memli Krasniqi, katër vitet e fundit kanë qenë vite pune, reformash dhe ringjalljeje për PDK-në. Ne kemi arritur fitore të rëndësishme në zgjedhjet lokale, kemi rritur ndjeshëm mbështetjen tonë midis qytetarëve në zgjedhjet e 9 shtatorit dhe kemi bërë hapa të mëdhenj drejt ndërkombëtarizimit të partisë sonë”.

“Partia Demokratike e Kosovës është një parti me përvojë në ndërtimin e shtetit, një histori ndërtimi dhe aftësinë për ta udhëhequr Kosovën drejt kapitullit të ardhshëm të zhvillimit dhe integrimit euroatlantik. Prandaj, me këtë Konventë, ne jo vetëm që po zgjedhim udhëheqjen e partisë, por edhe po përgatitemi për të udhëhequr vendin”, tha pak ditë më parë sekretarja e Përgjithshme e Partisë Demokratike të Kosovës, Vlora Çitaku.