Pasi u braktis në Budva, tani nxënësi përjashtohet edhe nga Mbrëmja e Maturës

Nxënësi i klasës së 12-të, Andi Maçani, ishte braktisur në Budva të Malit të Zi nga organizatorët e eksurzionit e që ishte në kuadër të një shkolle private në Kosovë, shkruan GazetaDemos.

Sipas familjarëve të tij, ai u keqtrajtua nga menaxhmenti i shkollës, konkretisht drejtoresha e shkollës, ndaj të cilëve prindërit u janë drejtuar edhe organeve të rendit dhe atyre të drejtësisë.

Por, ky veprim i prindërve të Andit siç duket i ka acaruar akoma më shumë menaxhmentin e shkollës, të cilët kanë vendosur të ndërmarrin edhe një tjetër veprim drastik ndaj nxënësit të tyre.

Ky vendim ka rezultuar me përjashtimin nga Mbrëmja e Maturës, e cila do të organizohet këtë të hënë duke filluar prej orës 19:30.

Nxënësi i është drejtuar edhe me një ankesë si shpresë të fundit për t’u lejuar në një prej mbrëmjeve më të rëndësishme të një nxënësi, mirëpo i njëjti nuk është përfillur.

Me një email i është drejtuar edhe SIA, mirëpo as ndaj tyre nuk ka pasur ndonjë përgjigje, qoftë edhe negative.