Pandora Papers zbulon ministrin e dytë serb me një kompani offshore

Pandora Papers ka zbuluar se përveç Sinisa Mali, një tjetër ministër serb, Novica Toncev, kishte gjithashtu një kompani sekrete të padeklaruar offshore, të regjistruar në Ishujt Virxhin Britanikë.

Pasi media investigative serbe KRIK publikoi konfirmimin e pretendimeve se Ministri i Financave i Serbisë, Sinisa Mali, zotëronte një sërë pronash në Bullgari të blera përmes kompanive sekrete offshore, ajo ka raportuar se “Pandora Papers” gjithashtu hedhin dritë mbi aktivitetet e fshehura të një tjetër ministri serb – Novica Toncev, ministër për zhvillimin e komunave të varfra.

Rrjedhja e madhe e dokumenteve financiare nga kompanitë offshore, “Pandora Papers”, ku përfshihen 12 milionë dosje, përbën rrjedhjen më të madhe të tillë në histori.

KRIK tha se dokumentet tregojnë se Toncev themeloi fshehurazi një kompani offshore në Ishujt Virxhin Britanikë në 2010, të cilën, si Mali, ai nuk e raportoi në Agjencinë Kundër Korrupsionit të vendit, siç ishte i detyruar ta bënte me ligj.

Toncev hapi një kompani të quajtur “Service for Efficient Energy” në parajsën e njohur fiskale, ku kompanitë mund të themelohen pa bërë të njohur pronarin e tyre.

Përmes kësaj, ai kishte hapur një llogari në Zvicër, arriti në përfundimin KRIK nga dokumentet, të rrjedhura nga agjencia zvicerane SFM, e cila merret me krijimin e kompanive offshore.

Pasi agjencia zvicerane themeloi kompaninë offshore të Toncev, ajo lëshoi ​​një faturë për tarifat për shërbimet e saj, një prej të cilëve ishte hapja e një llogarie në Zvicër.

Toncev, nënkryetar i Partisë Socialiste bashkëqeverisëse të Serbisë, SPS, fillimisht u tha gazetarëve të KRIK se ai nuk kishte lidhje me ndonjë kompani offshore dhe se ndoshta firma e tij ishte falsifikuar.

Ai që atëherë ka pranuar se ka në pronësi një kompani offshore, por pretendoi se nuk e kishte raportuar këtë gjë tek Agjencia për Parandalimin e Korrupsionit sepse në atë kohë ajo nuk ishte funksionale. “Kur një kompani fillon të punojë, unë raportoj, dhe ndërsa kur ajo nuk punon, unë nuk e raportoj”, u tha ai gazetarëve.

Toncev tha se ai e themeloi kompaninë me këshillën e një biznesmeni me bazë në Singapor, Darko Tamindzic, i cili i siguroi atij njerëz që e ndihmuan për të themeluar kompaninë. Pak dihet për Tamindzic, 60 vjeç, pavarësisht karrierës së tij të gjatë në fushën e biznesit dhe lidhjeve të tij ndërkombëtare.

Disa nga bashkëpunëtorët e tij i thanë KRIK se ai bën biznes kryesisht në Kinë. Një fotografi e rrallë e tij në internet është shkrepur në nëntor 2014 në Riad, Arabi Saudite, kur u nënshkrua një kontratë e madhe midis kompanisë shtetërore kineze Norinco, e cila merret me prodhimin dhe ndërtimin e armëve, dhe Soroof, një kompani në pronësi të princit të Arabisë Saudite Bander bin Abdullah Al Saud.

Njëra nga kompanitë e Tamindzic gjithashtu kishte një kontratë me një kompani në pronësi të Nikola Petrovic, ish-kreu i kompanisë shtetërore të transmetimit të energjisë elektrike në Serbi, emri i së cilës ka dalë gjithashtu në dokumentet e Pandora Papers. Gjatë kohës së tij në detyrë, edhe ai nuk e raportoi kompaninë  e tij offshore, e regjistruar gjithashtu në Ishujt Virxhin Britanikë, edhe pse e kishte të detyruar ta bënte këtë me ligj.Më shumë nga interneti