Pal Lekaj flet në emër të Kosovës në Parlamentin Evropian

Deputeti i Kuvendit nga radhët e Aleancës për Ardhmërinë e Kosovës, Pal Lekaj, ka marrë pjesë në Parlamentin Evropian, si pjesë e delegacionit të Kosovës në kuadër të Marrëveshjes së Stabilizim-Asociimit Bashkim Evropian-Kosovës.

Në fjalën e tij, Lekaj i është kundërpërgjigjur ashpër euro-deputetit kroat në lidhje me shqiptarët e Kosovës dhe kudo që ata jetojnë.

“Në vitet e ’80-a, ato shtete që nuk ia kanë dashur të mirën Kosovës, qytetarët e saj i kanë quajtur islamik, ekstremist, mafiozë, dhe kësisoj janë munduar të japin një perceptim të gabuar dhe në shpërputhje të plotë me realitetin”, ka thënë Lekaj.

Ai ka shtuar se shqiptarët kanë ndikuar në zhvillimin e Kroacisë, si dhe kanë qenë qytetarë besnikë të shteteve tjera si Gjermania, Austria, Zvicra e kudo që ata kanë jetuar.

“Mafia është internacionale dhe të tillë ka kudo në botë, ndërsa nëse rikthehemi edhe sot në ato vite dhe vazhdohet tutje me këto goditje për shqiptarët e Kosovës, atëherë duhet të keni argumente dhe fakte, por jo të flasim dhe ta atakojmë një popull të tërë dhe ta quajmë mafi. Unë kam jetuar në Kroaci dhe e di mirë se shqiptarët kanë ndikuar edhe në zhvillimin e Kroacisë, edhe të turizmit të saj, si dhe kanë qenë qytetarë lojalë të shteteve si Kroacia, Gjermania, Austria etj”, është shprehur ai.

Lekaj në Parlamentin Evropian ka thënë se kushdo dhe kurdo që flasin për shqiptarët, duhet të argumentojnë dhe ta faktojnë atë çka e thonë.

“Është shumë e kuptueshme që mund të ketë në secilin vend njerëz të tillë, por duhet të jemi korrekt dhe të vëmendshëm të prezantojmë argumente kur japim vlerësime të tilla për shqiptarët dhe për secilin popull të çfardo vendi”, ka përfunduar Lekaj.