Osmani nuk pranoi që Konjufca ta përfaqësojë VV-në në takim me liderët partiakë

Presidentja e Kosovës, Vjosa Osmani, ka folur rreth bojkotit që kryetari i Lëvizjes Vetëvendosje, Albin Kurti, ia bëri ftesës së saj për të diskutuar datën e zgjedhjeve, duke thënë se nuk i di arsyet e mungesës së tij, raporton Gazeta Demos.

Megjithatë, ajo tha se gatishmëria e nënkryetarit të kësaj partie, Glauk Konjufca, për të marrë pjesë nuk është pranuar, meqë të gjitha partitë janë njoftuar se takimi është i ftuar vetëm për kryetar të partive.

“Nuk e kam parë që dikush e ka quajtur bojkot mospjesëmarrjen e kryetarit. Siç e dini kanë qenë të ftuar kryetarët. Dua të përmend që nënkryetari i LVV-së ka shprehur gatishmëri që të vijë në takim, mirëpo meqë të gjitha partitë kanë qenë të informuara që ky takim është vetëm në nivel kryetarësh dhe ky parim ka vlejtur për të gjithë dhe ai e ka zbatuar këtë. Sot nuk ka qenë kryetari i VV-së, ne nuk e kemi arsyen”, tha Osmani.