Osmani dekoron post mortem Arbën Xhaferin me Urdhrin “Hasan Prishtina”

Presidentja e Republikës së Kosovës, Vjosa Osmani Sadriu, ka dekoruar sot post mortem me Urdhrin “Hasan Prishtina”, ideologun, politikanin, filozofin dhe liderin Arbën Xhaferi, në një ceremoni të organizuar në Ambasadën e Kosovës në Shkup, ku të pranishëm ishin edhe disa nga pjesëtarët e familjes së tij.

“Arbën Xhaferi do të kujtohet e vlerësohet përherë për vetëdijen e lartë intelektuale, artikulimin politik largpamës, mbrojtjen dhe promovimin e të drejtave njerëzore e kombëtare të shqiptarëve në Kosovë dhe sidomos në Maqedoninë e Veriut, si dhe për afirmimin e orientimit properëndimor të kombit shqiptar në frymën e rilindësve tanë”, ka deklaruar e para e shtetit të Kosovës.

Ndërkaq, në emër të familjes së Arbën Xhaferit, i biri i tij Iliri, falënderoi Osmanin për respektin institucional të treguar ndaj filozofit, intelektualit dhe liderit Arbën Xhaferi./Demos/