Albanian
Croatian
English
French
German
Serbian
Turkish
Opozita gjatë seancës së sotme në Kuvendin e Kosovës ka kërkuar që të miratohet një rezolutë për plotësimin e kërkesa të minatorëve të Trepçës të cilët janë në grevë tash e dhjetë ditë.
Shefi i Grupit Parlamentar të PDK-së, Abelard Tahiri tha se deri tani nuk kanë ndërmarrë asgjë pasi kanë pritur që Qeveria të zgjidh këtë problem, por që sipas tij një gjë e tillë nuk ndodhi.
“Si grup paralmentar i PDK-së, ashtu siç jemi dakorduar të hënën në mbledhjen e kryesisë, kemi procedu me një kërkesë për një debat me një rezolutë poashtu e cila i përkrah kërkesat e minatorëve të Trepçës. Tash e 10 ditë minatorët e Trepçës janë në grevë dhe ne për 10 ditë në asnjë rrethanë nuk kemi dashtë me sjell në Kuvend me politizu këtë çështje sepse i kemi dhënë kohë Qeverisë që të zgjidh këtë çështje dhe minatorët të dalin nga greva. Kjo nuk ka ndodhur. Ne rezolutën veçse e kemi proceduar dhe kërkojmë që sot të hyjë si pikë e parë miratimi i një rezolute me të cilën parlamenti i Kosovës kërkon mbështetjen e kërkesave të minatorëve të Trepçës”, tha ai.
Shefi i Grupit Parlamentar të LDK-së tha se duhet në mënyrë urgjente të trajtohet kjo çështje.
“Në menytë urgjente të trajtohet çështja e minatorëve të Trepçës. Kuvendi duhet të votojë një rezolutë pët plotësimin e kërkesave të tyre. Kërkesat e tyre janë minimaliste. Për shkak të shëndetit të tyre kjo çështje duhet të trajtohet sot”, tha shefi i grupit parlamentar të LDK-së, Arben Gashi.
Ndërsa Shefi i Grupit Parlamentar të AAK-së, Besnik Tahiri theksoi se përveç minatorëve, duhet të diskutohet edhe çështja e policëve të Kosovës.
“E mbështesim dhe mendojmë se është urgjente të mbahet një seancë në mbështetje të minatorëve. Po ashtu mendojmë se është shumë me rëndësi të diskutohet edhe çështja e policëve të Kosovës. Dje ka pasur një protestë dhe për sot është paralajmëruar një e tillë, andaj është urgjente që edhe kjo çështje të trajtohet”, tha shefi i grupit parlamentar të AAK-së, Besnik Tahiri.