Nxënësit kosovarë, të fundit në rajon e ndër të fundit në botë për njohuri në matematikë e shkencë

Nxënësit e klasës së katërt në Kosovë kanë dalë në mesin e atyre që janë ranguar më së ulëti në botë për arritjet matematikore dhe shkencore.

Organizata Ndërkombëtare për Vlerësimin e Arritjeve Arsimore (IEA) ka publikuar studimin e fundit ndërkombëtar të njohurive në matematikë dhe shkencë të nxënësve në mbarë botën.

Nga 58 shtete pjesëmarrëse, Kosova është renditur në vendin e 47-të për njohuritë në matematikë, ndërsa në vendin e 55-të për njohuritë në shkencë.

Për njohuritë në matematikë, vetëm nxënësit në Bosnjë e Hercegovinë qëndrojmë më keq sesa ata në Kosovë. Ndërkaq për njohuritë në shkencë, nxënësit kosovarë janë të fundit në rajon.

Nxënësit e Kosovës rangohen në pjesën e standardit të ulët, ku përfshihen ata nxënës që thjesht “demonstrojnë të kuptuarit bazë matematikor”. Po në fund, ata rangohen në mesin e atyre që thjesht “tregojnë dhe zbatojnë njohuritë e disa koncepteve shkencore”.