Një i vdekur e 10 të lënduar nga aksidenti në Komoran

Një person ka vdekur e 10 të tjerë kanë pësuar lëndime nga aksidenti i sotëm në Komoran.

Kjo u bë e ditur nga drejtori i Klinikës Emergjente në QKUK, Naser Syla i cili deklaroi se një person ka shkuar në spital pa shenja jete.

“10 të lënduarit janë duke u trajtuar në Qendrën Emergjente në QKUK. Dy prej të lënduarve janë me lëndime të rënda, njëri prej të cilëve është në gjendje jo stabile, ndërsa tjetri gjendjen e ka stabile” – ka thënë Syla.

Rasti u konfirmua edhe nga Policia e Kosovës ku sipas zëdhënësit të Policisë, Daut Hoxha, në aksident janë përfshirë gjashtë automjete dhe ka disa persona të lënduar.

“Menjëherë pas pranimit të informatës, njësitë policore kanë dalë në vendngjarje, ndërkohë që janë njoftuar edhe ekipet e emergjencës mjekësore dhe njësia e zjarrfikësve, të cilat kanë reaguar për t’u ofruar ndihmën e nevojshme personave të përfshirë dhe për menaxhimin e situatës”, ka deklaruar Hoxha.