Nis projekti i Ministrisë së Shëndetësisë për përzgjedhjen e mjekut familjar brenda zonës së banimit

Ministria e Shëndetësisë ka njoftuar se nga sot ka filluar projekti për përzgjedhjen e mjekut familjar në tërë Republikën e Kosovës, shkruan GazetaDemos.

Si fillim projekti pritet të zgjasë 100 ditë, ndërsa projekti i plotë pritet të përfundoj në fund të vitit 2025.

“Në përputhje me Planin e Veprimit për përcaktimin e kritereve për regjistrin e banorëve në Kujdesin Parësor Shëndetësor, Ministria e Shëndetësisë njofton se sot, më 25.09.2024, fillon Projekti për Përzgjedhjen e Mjekut Familjar brenda zonës së banimit. Ky projekt, pas periudhës testuese në katër komuna dhe regjistrimit të popullsisë për përcaktimin e numrit të saktë të banorëve, fillon sot të zbatohet në të gjithë territorin e Republikës së Kosovës. Si fillim, do të zgjasë 100 ditë, ndërsa projekti i plotë pritet të përfundojë deri në fund të vitit 2025”, thuhet në njoftimin e Ministrisë së Shëndetësisë.

Qëllimi i këtij projekti është që të krijohet një listë e saktë e banorëve dhe pacientëve për mjekët familjarë, me qëllim të organizimit më efektiv të shërbimeve shëndetësore.

Njoftimi i plotë i Ministrisë së Shëndetësisë:

Fillon Projekti për Përzgjedhjen e Mjekut Familjar në tërë territorin e Republikës së Kosovës.
Në përputhje me Planin e Veprimit për përcaktimin e kritereve për regjistrin e banorëve në Kujdesin Parësor Shëndetësor, Ministria e Shëndetësisë njofton se sot, më 25.09.2024, fillon Projekti për Përzgjedhjen e Mjekut Familjar brenda zonës së banimit.
Ky projekt, pas periudhës testuese në katër komuna dhe regjistrimit të popullsisë për përcaktimin e numrit të saktë të banorëve, fillon sot të zbatohet në të gjithë territorin e Republikës së Kosovës. Si fillim, do të zgjasë 100 ditë, ndërsa projekti i plotë pritet të përfundojë deri në fund të vitit 2025.
Ky plan ka për qëllim krijimin e një liste të saktë të banorëve dhe pacientëve për mjekët familjarë, duke u fokusuar në një organizim më efektiv të shërbimeve shëndetësore.
Poashtu, krijimi i kësaj liste do të lehtësojë identifikimin e pacientëve me nevoja specifike shëndetësore, duke u mundësuar mjekëve të ndjekin nga afër historikun e tyre, për parandalim dhe trajtim më cilësor të sëmundjeve.
Ministria e Shëndetësisë fton qytetarët që të shfrytëzojnë mundësinë për të përzgjedhur mjekun familjar përmes Platformës shtetërore E-KOSOVA!. Informacionet për mënyrën e aplikimit do të publikohen rregullisht në faqen zyrtare të Ministrisë së Shëndetësisë në Facebook dhe në të gjitha objektet e Kujdesit Parësor Shëndetësor në Kosovë.
“MJEKU IM-SHËNDETI IM”