Nga 2019-ta, voziste veturën e tij pa regjistruar – IPK rekomandon suspendenimin e zyrtarit policor në Suharekë

Një zyrtar policor në Suharekë, është ndaluar sot nga IPK dhe ka rezultuar se po e voziste veturën e tij pa regjistrim që nga viti 2019.

Për këtë shkelje, IPK ka rekomanduar suspendimin e tij.

IPK ka falënderuar qytetarët për bashkëpunim derisa ka thënë se mbesin të përkushtuar drejt ndërmarrjes së veprimeve që synojnë fuqizimin e integritetit policor.

Komunikata e plotë e IPK-së:

Hetuesit e Inspektoratit Policor të Kosovës kanë pranuar informacione përmes rrugëve operative bazuar në të cilat dyshohej se një zyrtar policor i Stacionit Policor të Suharekës drejton veturën e tij private pa regjistrim.

Pas pranimit të informacionit është verifikuar informacioni dhe zyrtari në fjalë është ndaluar sot në rrugë nga hetuesit e IPK-së ku pas kontrollit të dokumentacionit të veturës së tij ka rezultuar se ky automjet nuk është regjistruar që nga viti 2019.

Lidhur me rastin janë njoftuar Njësia e Trafikut Rajonal të Prizrenit të cilët kanë ndërmarrë veprimet e nevojshme ligjore kurse IPK ka rekomanduar suspendimin për zyrtarin policor.

IPK falënderon të gjithë qytetarët për bashkëpunim duke mbetur e përkushtuar drejt ndërmarrjes së veprimeve që synojnë fuqizimin e integritetit policor.