Netanyahu: Nëse duhet, Izraeli gati të luftojë edhe pa ndihmën e Amerikës

Kryeministri i Izraelit, Benjamin Netanyahu, ka dhënë një deklaratë të fortë në lidhje me tensionet e fundit me Iranin, duke theksuar se përfshirja e Shteteve të Bashkuara në këtë konflikt është një vendim që i takon vetë presidentit amerikan, Donald Trump.

“Do të bëjë atë që është mirë për Amerikën, dhe unë do të bëj atë që është mirë për Izraelin,” ka thënë Netanyahu, duke shtuar me besim se “presidenti amerikan e njeh lojën.”

Ai ka shtuar se Izraeli është i gatshëm të përmbushë misionin i vetëm, nëse është e nevojshme, dhe ka theksuar se synimi është i qartë: “Në fund të këtij operacioni, nuk do të ketë më kërcënim bërthamor ndaj Izraelit, dhe as kërcënim balistik.”.

Këto deklarata vijnë pas vizitës së tij në spitalin Soroka, që u godit gjatë një sulmi iranian, dhe në një periudhë të tensionuar që rrezikon përshkallëzim të konfliktit në Lindjen e Mesme.