Netanyahu falënderon Trump-in për mbështetjen: Së bashku do të vazhdojmë t’i mundim armiqtë tanë

Lideri izraelit Benjamin Netanyahu ka reaguar me falënderime publike ndaj presidentit amerikan, Donald Trump, pas një postimi mbështetës të këtij të fundit në rrjetin e tij “Truth Social”.

Në reagimin e tij, Netanyahu vlerësoi lartë fjalët e Trump-it, duke theksuar se ato janë një shenjë e mbështetjes së fortë për Izraelin dhe popullin hebre.

“Faleminderit mikut tim, Presidentit Donald Trump, për mbështetjen e tij emocionuese ndaj meje dhe mbështetjen e madhe ndaj Izraelit dhe popullit hebre. Apeli i tij për të anuluar gjuetinë e shtrigave kundër meje dhe njohja e përpjekjeve tona të përbashkëta kundër kërcënimit bërthamor të Iranit vlerësohen shumë. Së bashku, ne do të vazhdojmë të punojmë për të mundur armiqtë tanë të përbashkët, për të liruar të burgosurit tanë dhe për të zgjeruar shpejt rrethin e paqes”, shkroi Netanyahu në X.

Kjo deklaratë vjen menjëherë pas postimit të Trump-it, i cili kërkoi që të anulohet gjyqi ndaj Netanyahut, duke e quajtur atë një hero.

“Bibi dhe unë kemi kaluar së bashku tani një rrugë ferri… Duhet të anulohet menjëherë gjyqi i Bibit Netanyahu ose t’i jepet atij një falje – si një hero i madh i vendit,” ka shkruar Trump.

Ai e ka lavdëruar Netanyahun si “ndoshta luftëtari më i madh në historinë e Izraelit” për angazhimin e tij ndaj çështjes së sigurisë dhe shkatërrimit të kërcënimeve bërthamore nga Irani.

Ky reagim i Netanyahut vjen vetëm pak orë para një seance gjyqësore, ku ai përballet me akuza për korrupsion, mashtrim dhe thyerje të besimit.