Nëna e Agonis Tetajt vendos duart mbi kokë kur avokati Besnik Berisha arsyeton veprimin e klientit të tij Shaban Gogaj

Në Gjykatën e Apelit të enjten janë shqyrtuar ankesat e palëve në rastin e vrasjes së Agonis Tetajt nga Shaban Gogaj, gjashtë vjet më parë, shkruan GazetaDemos.

Gjyqtari referues, Hashim Çollaku, tha në këtë seancë se ankesë ndaj aktgjykimit të shkallës së parë ka ushtruar Prokuroria Themelore në Pejë, përfaqësuesi i palës së dëmtuar, avokati Berat Tmava, e po ashtu edhe avokati Besnik Berisha në cilësinë e mbrojtësit të të akuzuarit, Shaban Gogaj.

Në këtë seancë, morën pjesë edhe prindërit e Agonis Tetajt, ku ngritën çështjen e vonesës së procesit.

“Sot 6 vite e 10 ditë u bënë që jemi nëpër dyer të gjykatave, kërkojmë drejtësi për Agonisin, që ju me marrë një vendim sot këtu, për mos me u end më nëpër gjykata lartë e poshtë”, tha nëna e Agonis Tetajt në fillim të seancës.

Ndërsa, avokati i Shaban Gogajt, Besnik Berisha e ka arsyetuar veprimin e klientit në tij, duke thënë se ky rast është gjykuar dy herë dhe se në të dyja rastet, ka qenë epilogu i njëjtë, që ka të bëjë me vrasje nga pakujdesia.

Ai tha se në atë moment, si rezultat i një pakujdesie ka ndryshuar përjetësisht jeta e akuzuarit Gogaj dhe për familjes Tetaj, përderisa sipas tij, i akuzuari Gogaj kishte qenë në pritje të një momenti lumturie.

Derisa po fliste avokati Berisha, nëna e Agonis Tetajt, nuk mund t’i ndalte lotët, teksa në një moment vendos duart mbi kokë.

Për më shumë ndiqni videon: