Ndërtimi i shkollës në Kalabri/ Rama e pret në takim qytetarin që pretendon se prona është e tij

Kryetari i Prishtinës, Përparim Rama, ka pritur në takim qytetarin, Refik Rafuna, që dje kur është vendosur gurthemeli për ndërtimin e shkollës në Lagjen Kalabria, ka pretenduar se ishte prona e tij.

Rama ka thënë se kjo pronë është e regjistruar në emër të Kryeqytetit. Sipas, kryetarit lokacioni ku parashihet të ndërtohet shkolla ka kaluar nëpër të gjitha procedurat për ndërtim.

Ndërsa, qytetari Rafuna, i theksojë Rames në takim që kjo pronë është në proces gjyqësor dhe ka kërkuar që të ndalen punimet, përcjell IndeksOnline.

Postimi i plotë:

Dje gjatë vendosjes së gurthemelit të shkollës së re në lagjen “Kalabria”, qytetari ,Refik Rafuna, erdhi në lokacionin e ndërtimit me pretendimet se një pjesë e tokës ku po ndërtohet shkolla është në pronësi të tij. Unë i premtova z. Rafuna se do ta pres në takim për të shpjeguar rastin, dhe atë e bëra sot në mëngjes.

Gjatë takimit i shpjegova z. Rafuna se pronat në të cilat ka filluar ndërtimi i shkollës së re në Lagjen Kalabria janë të regjistruara në emër të Kryeqytetit. Po ashtu, sipas të gjitha planeve rregullative deri më sot, ky lokacion me pronat përkatëse ka qenë i destinuar për objekt shkollor për të plotësuar nevojat e banorëve të Lagjes Kalabria.

E informova se janë një numër i procedurave ligjore nëpër të cilat kalojnë projektet për të ardhur deri të ndërtimi, dhe kjo shkollë ka kaluar nëpër të gjitha këto procedura.

Z. Rafuna na informoi se rasti është në procedurë gjyqësore për pretendimet e tij rreth një pjese të kësaj prone dhe që kërkesa e tij ishte që të ndalen punimet. Kryeqyteti nuk i mohon askujt të drejtën e ushtrimit të ankesës apo inicimit të rastit gjyqësor, por derisa nuk ka vendim gjyqësor për vendosjen e masës së përkohshme (e cila i është refuzuar palës) puna në ndërtimin e shkollës në lagjen “Kalabria” po vazhdon sipas planit pasi Kryeqyteti ka kryer të gjitha procedurat për ndërtimin e shkollës në atë lokacion në pajtim me planin rregullues.