Nagip Krasniqit i vazhdohet pezullimi nga detyra e kryeshefit të KEK-ut

Bordi i Drejtorëve i Korporatës Energjetike të Kosovës (KEK) ia kanë vazhduar masën e pezullimit të përkohshëm nga kryerja e detyrave dhe obligimeve Nagip Krasniqit, si kryeshef i KEK-ut. Mbi të rëndojnë akuza për “Keqpërdorim i detyrës zyrtare”, “Ushtrim ndikimi” dhe “Konflikt interesi”.

Me vendim të Bordit, të cilin e ka siguruar gazeta online Reporteri.net, Kasniqit i është vazhduar pezullimi nga detyra jo më shumë se 6 muaj. Vendimi për pezullim ka hyrë në fuqi dje, të enjten e 19 tetorit.

Në vend të tij Nagip Krasniqit, detyrat si kryeshef i KEK-ut do të vazhdojë t’i kryejë Perparim Kabashi.

Ndërkohë në shtator, Gjykata Themelore në Prishtinë ka liruar nga paraburgimi ish-kryeshefin e KEK-ut të akuzuar për korrupsion, Nagip Krasniqin.

Lajmin e pati konfirmuar për Reporteri.net, Zëdhënësja e Gjykatës Themelore të Prishtinës, Mirlinda Gashi.

“Referuar kërkesës tuaj për informata, ju njoftojmë se pas kërkesës së Prokurorisë Speciale të Republikës së Kosovës për zëvendësimin e masës së paraburgimit me masën e ndalimit për t’ju afruar vendit apo personit të caktuar në çështjen penale kundër të pandehurit N.K, Gjykata Themelore në Prishtinë – Departamenti Special ka vendosur lidhur me masën kërkesën e Prokurorisë Speciale të Republikës së Kosovës”.

Sipas vendimit të Gjykatës, Krasniqit i ndalohet të afrohet objektit të KEK-ut apo të punësuarve në këtë korporatë. Vendimi thotë se i njëjti duhet të mbajë 50 metra distancë.

Krasniqi është arrestuar më 19 prill, pas bastisjeve që janë kryer nga Njësia e Veçantë e Hetimeve, në zyrën e tij në KEK dhe dy banesat e tij dhe i njëjti u dërgua në mbajtje.