Mustafa: Kuvendi nuk është teatër në të cilin luhet një shfaqje, partia që doli e para në zgjedhje duhet të hapë rrugë

Dje ka dështuar për herë të 20-të të konstituohet Kuvendi i Kosovës.

Kryesuesi i seancës, Avni Dehari, hodhi për votim formimin e një Komisioni për votim të fshehtë por nuk arrit t’i marrë votat e mjaftueshme.

Kandidatja e propozuar nga Lëvizja Vetëvendosje, Albulena Haxhiu, edhe pas disa tentativash nuk arrin t’i sigurojë votat e mjaftueshme për tu zgjedhur në krye të Kuvendit.

Në lidhje me këtë ngërç institucional të krijuar dhe si duhet të dilet nga kjo krizë ka folur ish-kryeministri njëherësh ish-kryetar i LDK-së, Isa Mustafa.

Mustafa tha se për të gjetur një zgjidhje është e nevojshme që të gjitha institucionet e Kosovës dhe subjektet politike ta kuptojnë situatën seriozisht dhe urgjente.

Ish-kryeministri Mustafa tha se ‘Kuvendi nuk është teatër në të cilin luhet një shfaqj’ dhe se partia e cila doli e para në zgjedhje duhet të hapë rrugë dhe sfidojë deputetët me një tjetër kandidat për kryetar Kuvendi.

“Është vështirë të ipen receta nga jashtë. Por për të gjetë zgjidhje është e nevojshme që të gjitha institucionet e Kosovës dhe subjektet politike ta kuptojnë situatën seriozisht dhe urgjente. Kuvendi nuk është teatër në të cilin luhet një shfaqje”

“Partia që doli e para në zgjedhje duhet të hapë rrugë dhe të sfidojë deputetët me kandidatë tjerë për kryetar, me votim të hapur ashtu siç është përcaktuar në fillim të procesit. Pastaj të provohet një shumicë funksionale qeverisëse” tha Mustafa.

Nëser duke filluar nga ora 11:00 pritet të mbahet seanca e radhës ku do të tentohet sërish të konstituohet Kuvendi.

Edhe përfaqësuesja e lartë e Bashkimit Evropian, Kaja Kallas, e cila qëndroi së fundmi për vizitë në Prishtinë bëri thirrje për formimin sa më të shpejtë të institucioneve.

“Formimi i Kuvendit të ri dhe Qeverisë së re është thelbësor për stabilitetin dhe rritjen e Kosovës, si dhe për të ardhmen evropiane të Kosovës” tha Kallas në konferencën për media raporton “Gazeta Blic”.