Mustafa i LDK-së: Kurti nuk ka asgjë të përbashkët me Rugovën

Deputeti i Lidhjes Demokratike të Kosovës, Besian Mustafa, ka thënë se ish-Presidenti i Kosovës, Ibrahim Rugova nuk ka asgjë të përbashkët me Kryeministrin e tanishëm të Kosovës, Albin Kurti.

Mustafa përmes një postimi në Facebook, ka shkruar se të gjithë politikanët e krahut tjetër, përkundër dëshirës së tyre, kanë përfunduar në rrugën shtetformuese të shtruar nga Rugova.

“Jo, asgjë të përbashkët me Rugovën nuk ka Kurti. Të gjithë politikanët e krahut tjetër, përkundër dëshirës së tyre, kanë përfunduar në rrugën shtetformuese të shtruar nga Rugova. Kjo nuk i bën ata rugovist, kjo e tregon qartazi edhe një herë Rugovën vizionar dhe ata të tjerët thjeshtë përcjellës të vegjël që bëjnë shumë zhurmë e përfundojnë natyrshëm në rrugën e vetme të vërtetë. Atë që ka trasuar Rugova”, ka shkruar Mustafa.