Munishi entuziast pas fitores: Do të luajmë lojën më të mirë në Kosovë

Trajneri i Prishtinës, Ismet Munishi është shprehu mjaftë i kënaqur me paraqitjen e futbollistëve të tij në ndeshjen ndaj Malishevës.

Prishtina arriti të triumfonte me rezultat 4:2 përball një kundërshtari si Malisheva dhe ky fakt e ka lënë të kënaqur trajnerin prishtinas.

“Jam jashtëzakonisht i lumtur me lojën dhe angazhimin e futbollistëve. Jemi të përgatitur shumë fizikisht. Djemtë kanë punuar gjatë fazës përgatitore dhe gjatë gjithë kësaj kohe. Kemi shumë karakter brenda ekipit. Pas pjesës së parë, rezultati ishte i thellë. Ishin gola të shënuar pak a shumë të ushtruar në stërvitje. Sulmuam me shumë lojtarë sulmues”, tha Munishi.

Tutje, Munishi ka shtuar se ai me klubin “bardhë e kaltërt” ka një projekt afatgjatë dhe sipas tij ekipi prishtinas do të luajë futbollin më të mirë në Kosovë.

” Prishtina do ta luajë futbollin më të mirë në Kosovë. Kemi punuar që t’i thyejmë linjat e mesfushës dhe mbrojtjes së kundërshtarit. E kemi një projekt shumë afatgjatë. Duhet ta bëjmë lojën tonë që t’i kënaqim tifozët, “Plisat”, dhe kjo është mënyra se si duhet të luajë Prishtina”, përfundoi Munishi.