Mjekët e tri reparteve në Prizren bojkotojnë punën, hyjnë në grevë pasi morën gjysmë page

Gjatë ditës së sotme në Spitalin Rajonal të Prizrenit në tri reparte është bojkotuar puna, shkruan GazetaDemos.

Në redaksinë tonë janë ankuar disa pacientë që sot nuk po marrin shërbime në Spitalin e Prizrenit për shkak që disa mjekë kanë hyrë në grevë.

Sipas burimeve të GazetësDemos është raportuar se reparti i Fizioterapisë, Anesteziologëve dhe Radiologjisë janë në grevë dhe sot pacientët nuk kanë mundur të marrin shërbime.

Sipas informacioneve tona 25 mjekë janë në grevë për shkak të mosekzekutimit të pagave të muajit maj, për këtë GazetaDemos, ka biseduar me shefin e personelit i njëjti edhe zyrtar i mediave dhe marrëdhënieve me publikun, Shefajet Berisha.

Berisha bëri të ditur se mjekët të cilët e kanë bojkotuar punën gjatë ditë së sotme jane të tre reparteve të fizioterapisë, anesteziologëve dhe radiologjisë, mjekët kanë qenë të pakënaqur për shkak mos marrjes së pagave të muajit maj.

Tutje theksoi që janë duke biseduar me ShSKUK-në dhe Ministrinë e Shëndetësisë.

Mbetet të shihet se si do të veproj SHSKUK-ja dhe Ministria e Shëndetësisë në raport me kërkesat e grevistëve, pasi tre repartet e lartëcekura varen direkt nga punëtorët grevistë.