Miratohet injeksioni kundër HIV-it: Mbrojtje me vetëm dy doza në vit

Administrata Amerikane e Ushqimit dhe Barnave (FDA) ka miratuar Yeztugo (lenacapavir), ilaçin e parë dhe të vetëm injektues që parandalon infektimin me HIV me vetëm dy doza në vit. Ky zhvillim paraqet një hap të madh në luftën globale kundër HIV-it.

Ilaçi, i zhvilluar nga kompania Gilead Sciences, ka treguar efektivitet mbresëlënës prej 99.9% në studime klinike të fazës së tretë. Ai është dizajnuar posaçërisht për persona që kanë vështirësi në përdorimin ditor të pilulave apo që përballen me stigmat sociale dhe mungesë të qasjes në shërbime shëndetësore.

“Kjo është një risi që mund të ndryshojë situatën përfundimisht,” tha Dr. Matthew Hamill, infektolog në Universitetin Johns Hopkins.

Në dy prova klinike të rëndësishme – PURPOSE 1 dhe PURPOSE 2 – ndër më të mëdhatë për këtë lloj terapie, ilaçi tregoi efikasitet pothuajse të plotë. Në Afrikën Sub-Sahariane, asnjë nga mbi 5,000 gra cisgjinore të përfshira në studim nuk u infektua. Ndërkohë, në një grup prej mbi 3,000 burrash homoseksualë dhe persona me gjini të ndryshme, u regjistruan vetëm dy raste të infektimit.

Miratimi i Yeztugo pritet të sjellë një revolucion në parandalimin e HIV-it, duke ofruar mbrojtje të qëndrueshme, praktike dhe më pak të ndikuar nga faktorë socialë apo ekonomikë.