Albanian
Croatian
English
French
German
Serbian
Turkish
Gjatë muajit tetor dhe gjatë ditëve të para të nëntorit, duket se interesi i qytetarëve të Kosovës për vaksinim ka rënë dukshëm, si pasojë e normalizimit të situatës me pandeminë COVID-19.
Ndërkaq, Ministria e Shëndetësisë po vazhdon të lehtësojë procedurën për vaksinim, duke mundësuar që qytetarët të vaksinohen pa termin.
Shpërndarja e ekipeve mobile në qendra tregtare dhe aprovimi për të lejuar vaksinimin e fëmijëve nga 12 deri në 15 vjeç janë disa nga vendiet që Ministria e Shëndetësisë ka marrë gjatë javës së parë të tetorit.
Ministria e Shëndetësisë ka vlerësuar se tashmë një numër i konsideruar i qytetarëve të grup-moshave të ndryshme janë vaksinuar kundër COVID-19 dhe kjo e bën edhe më të lehtë menaxhimin e procesit të vaksinimit në çdo qendër, ku përmes ekipeve të vaksinimit në dispozicion, ka kapacitete për t’iu përgjigjur të gjitha kërkesave të qytetarëve për vaksinim.
Prandaj, është marrë vendim dhe qytetarët duke filluar nga dita e djeshme kanë nisur të vaksinohen në cilëndo qendër të vaksinimit në Kosovë, pa termin të caktuar paraprakisht.
“Qytetarët mund të vaksinohen në secilën qendër të vaksinimit kudo në Kosovë, pavarësisht se cilës komunë i takojnë me vendbanim”, thuhej në njoftimin e MSH-së.
Ndërkaq të enjten, pas njoftimit të MSH-së, ka filluar dhënia e vaksinës antiCOVID-19 edhe në qendrën tregtare Albi Mall për të gjithë të interesuarit që ende nuk e kanë marrë vaksinën, derisa pritet që së shpejti i njëjti proces të fillojë edhe në qendrat tjera tregtare.
Ministria e Shëndetësisë ka miratuar rekomandimin e Komitetit për imunizim kundër COVID-19 për vaksinimin e fëmijëve të moshës 12-15 vjeç (pa indikacione shëndetësore) me vaksinën Pfizer BioNTech, me kërkesë dhe vullnet të prindit apo kujdestarit ligjor.
Në njoftimin për media të MSH-së thuhet se vaksinimi i kësaj grup-moshe mund të bëhet në të gjitha qendrat e vaksinimit kundër COVID-19 në Kosovë, vetëm në prani të prindit apo kujdestarit ligjor.