​Mësimi të shtunave, në Gjakovë rritet pjesëmarrja e nxënësve në shkolla

Në shkollat fillore në Komunën e Gjakovës edhe këtë të shtunë po mbahet kompensimi i orëve të humbura të mësimit si pasojë e grevës në arsim. Megjithatë, kjo nuk po ndodhë nëpër fshatra të kësaj komune, pasi nxënësit nuk shkuan në shkollë.

Krahasuar me të shtunën e kaluar, sot është rritur për dhjetë për qind pjesëmarrja e nxënësve në shkolla.

Drejtoresha e Arsimit në Komunën e Gjakovës, Eranda Kumnova-Baçi ka thënë se këtë të shtunë përqindja e pjesëmarrësve të nxënësve në shkolla është 35 për qind, e që është më shumë se sa të shtunën e kaluar.

Baçi, tha se në shkollat e fshatrave nuk po mbahet mësim, për shkak se nuk janë dalë nxënësit.

“Në krahasim me të shtunën e kaluar në të cilën e kemi pasur afërsisht 25% të pjesëmarrjes së nxënësve në shkolla, këtë të shtunë deri më tani ka një rritje të lehtë. Është rreth 35 për qind pjesëmarrja e nxënësve në shkolla. Shkollat e fshatrave kryesisht nuk janë dalë, mësimdhënësit kanë dalë, mirëpo nxënësit jo. Ndërsa në qytet e kemi një rritje në shkollën fillore “Zekeria Rexha”, në krahasim me të shtunën e kaluar…Tek ato shkollat të cilat pjesëmarrja është dukshëm më mirë është duke u mbajtur mësim, ndërsa te shkollat të cilat nuk kanë shkuar nxënësit nuk po mbahet. Situata është pak më ndryshe se të shtunën e kaluar”, tha ajo.

Pavarësisht që nuk kanë qenë të pëlqimit me kalendarin e ri nga MASHT-i, ajo tha se është shpërndarë në të gjitha shkollat, pasi ka qenë për detyrë. Derisa shtoi se është më e drejtë opsioni i kryetari të kësaj komune, që mësimi i humbur të kompensohet gjatë ditëve të javës me nga një orë më shumë.

“Ne e kemi shpërndarë për shkak se drejtoria e arsimit e ka për detyrë ta shpërndajë kalendarin e MAShT-it, porse ne prapë mendojmë se opsioni i kryetarit të komunës, Ardian Gjini, i cili ka kërkuar që në ditët e punës të shtohet nga një orë mësimi për t’i kompensuar orët e humbura do të ishte më efektiv. Ne prapë mendojmë që ajo pjesë është më efektive sesa këto të shtuna ku shihet një pjesëmarrje e ulët e nxënësve”, shtoi ajo.

Drejtori i shkollës fillore në Komunën e Gjakovës, Pleuart Rudi tha për KosovaPress, se krahasuar me të shtunën e kaluar, këtë të shtunë është rritur përqindja e nxënësve në shkollë.

“Për dallim nga e shtuna e kaluar, këtë të shtune kemi filluar me dy nivele të procesit mësimor. Procesi mësimor është duke u mbajtur i rregullt, me orar të ditës së premte. Në kuadër të ndërrimit të paradites, i kemi afërsisht 474 nxënës, kemi 65 për qind apo 308 nxënës në të dy objektet e shkollës tonë, duke u nisur nga klasa parafillore e deri te klasa tetë…Pavarësisht se në disa klasa kemi mungesa të nxënësve, por po mundohemi që të u bëjmë me dije edhe nxënësve por edhe prindërve që ditët e humbura duhet zëvendësohen”, tha ai.

Ndërsa, në një dokument që Ministria e Arsimit ua ka dërguar drejtorive, të enjten është kërkuar që në takimet e kujdestarëve të klasave me prindër të sqarohet domosdoshmëria e realizimit të ditëve të mësimit për orët e pambajtura si pasojë e grevës, në funksion të zbatimit të plan-programit dhe arritjes së rezultateve mësimore të synuara për nxënësit.

Kundër mbajtjes së mësimit të shtunave po vazhdon të shprehet Këshilli i Prindërve të Kosovës dhe SBAShK-u.

Këta të fundit kanë refuzuar mbajtjen e mësimit të shtunën me shkakun se kanë aktivitete të tjera në këtë ditë dhe është e drejtë pushimi për ata.

Greva në arsim është mbajtur nga 25 gushti e deri më 3 tetor.