“Bjellorusia po përgatitet t’i shpall luftë Ukrainës”

Disa media ukrainase kanë raportuar se njësitë e forcave të operacioneve speciale bjelloruse po përgatiten për një ulje ajrore në Ukrainë.

Këtë e dëshmojnë informacionet e ZN.UA të marra nga burime diplomatike.

“Në këtë mënyrë, Bjellorusia fillon një pushtim të Ukrainës me personelin e saj ushtarak”, raporton ZN.UA.

Nga të dhënat paraprake bëhet e ditur se vendndodhjet e mundshme të uljes janë drejtimet e Kiev-it dhe Zhytomyr-it.

Më herët, Qendra për Strategjitë e Mbrojtjes raportoi se ekziston një probabilitet shumë i lartë që Republika e Bjellorusisë të vendosë në orët e ardhshme për pjesëmarrjen e Forcave të Armatosura në luftën e zhvilluar nga Federata Ruse kundër Ukrainës.

Kjo nënkupton përdorimin e të gjitha forcave dhe mjeteve të armatosura të Bjellorusisë kundër forcave mbrojtëse të Ukrainës.

Kujtojmë se më 24 shkurt, Federata Ruse pushtoi Ukrainën dhe shkaktoi një kolaps të vërtetë.