Albanian
Croatian
English
French
German
Serbian
Turkish
Nënshkrimi i kontratës me prodhuesin shtetëror turk “Makine ve Kimya Endüstrisi” (MKE) për ndërtimin e një fabrike të municionit po shihet me skepticizëm nga opozita.
Përfaqësuesit e partive opozitare kanë bërë me dije se ky ka qenë një hap i ngutshëm i Qeverisë Kurti.
Ata kanë vlerësuar se një gjë e tillë është dashur të bëhet me një kompani amerikane.
Deputeti i PDK-së, Hysen Berisha, e ka kritikuar Qeverinë për një gjë të tillë.
Në Kanal 10, ai ka thënë se ky veprim është një biznes në mes të qeveritareve dhe zyrtarëve të kompanisë.
“Fabrika e municioneve është thjesht biznes i nxitur mes qeveritarëve dhe turqve, s’ka lidhje me lejen amerikane dhe pasojat e kësaj do t’i shohim vitin e ardhshëm sepse çështja e qëndrueshmërisë në ushqim ka me ia ndal rrugën qatje”, ka thënë Berisha.
Edhe më i ashpër ka qenë ish-deputeti i AAK-së, Daut Haradinaj.
Ai ka bërë me dije se Qeveria ka anashkaluar kompanitë amerikane në këtë proces.
“Është gjithmonë lajm i mirë kur Kosova avancon në sektorin e sigurisë dhe prodhimit të municionit. Por të lihen anash kompanitë amerikane me letra mbi tavolinë, është gabim. Falënderues ndaj Turqisë për përkrahjen e vazhdueshme, mirëpo çdo gjë që ka të bëjë me ushtri, municion e siguri – i jemi borxhli të përjetshëm Amerikës”, ka shkruar ai në profilin e tij në “Facebook”.
Haradinaj ka kërkuar të bëhet publike kontrata me prodhuesin shtetëror turk “Makine ve Kimya Endüstrisi”.
“Gabim në hapa, njësoj sikur me energjetikë, me anulimin e kontratës me Contour Global për ndërtimin e termocentralit Kosova e Re dhe me anulimin e projektit të gazsjellësit amerikan. P.S. Publiko kontratën Kryeministër! Boll mo”, ka shkruar ai.
Më 16 dhjetor, Qeveria e Kosovës ka nënshkruar kontratë me prodhuesin shtetëror turk “Makine ve Kimya Endüstrisi” (MKE) për ndërtimin e fabrikës së municionit.
Më këtë rast, kryeministri Albin Kurti ka vlerësuar se ky nënshkrim ka vendosur themelet e industrisë sonë të mbrojtjes.
“Sapo nënshkruam kontratë me prodhuesin shtetëror turk “Makine ve Kimya Endüstrisi” (MKE), me të cilën po vendosim themelet e industrisë sonë të mbrojtjes. MKE merr përsipër ta vë në funksion fabrikën e municioneve e cila do të shërbejë për prodhimin e kalibrave të ndryshëm të municioneve sipas standardeve të NATO-s. Në këtë kontratë, përveç makinerisë prodhuese përfshihet edhe trajnimi i stafit, mirëmbajtja për një kohë të caktuar, si dhe pajisja me sisteme për testim të cilësisë dhe për kalibrim. Me të filluar prodhimi, fabrika do të funksionojë si ndërmarrje publike dhe si markë 100% vendore”, ka shkruar kryeministri Kurti.
Kurse, ministri i Mbrojtjes, Ejup Maqedonci, ka vlerësuar se ky është një hap që rrit sigurinë në vend.
“Edhe një hap i radhës, në rrugën tonë që ta bëjmë Kosovën me industri të mbrojtjes. Për mbrojtjen e Kosovës dhe sigurinë e saj. Hap që rrit sigurinë tonë e kontribuon edhe në paqen rajonale e më gjerë! Vazhdojmë me punë të mbara!”, ka shkruar Maqedonci në profilin e tij në “Facebook”.