Mark Zuckerberg pranon gabimin e madh që bëri me Facebook dhe Instagram

Bëhet e ditur se Facebook-u ka qenë në telashe të mëdha së fundmi, gjë që mund ta shohim nga rënia e numrit të përdoruesve, por edhe nga situata në bursë, ku humbën qindra miliarda dollarë këtë vit.

Në një intervistë të fundit dhënë për “Stratechery“, Mark Zuckerberg shpjegoi se cili mund të jetë shkaku i këtyre problemeve dhe pranoi gabimin e tij në lidhje me strategjinë e kompanisë.

Disa vite më parë, Zuckerberg ishte i bindur se përdoruesit dëshironin që Facebook të bëhej një platformë sa më personale, d.m.th., përmbajtjet e publikuara nga miqtë dhe të afërmit e tyre shfaqeshin në burimet e tyre.

Sot është e qartë, siç e ka pranuar edhe ai vetë, se kjo ishte një mënyrë krejtësisht e gabuar e të menduarit, shkruan zimo.dnevnik.hr.

Rezulton se përdoruesit duan përmbajtjen më të mirë dhe cilësore dhe nuk ka rëndësi kush e publikon atë përmbajtje. Këtë e kuptuan me kohë në TikTok, prandaj popullariteti i këtij rrjeti po rritet vazhdimisht, ndërkohë që përdoruesit dalëngadalë po largohen nga Facebook.

Edhe pse Meta në Instagram u përpoq të ndryshonte algoritmin për të qenë më i ngjashëm me TikTok, përdoruesit nuk ishin të kënaqur sepse nuk duan që rrjeti të bëhet thjesht një kopje e TikTok.

Zuckerberg thekson se në fillim, TikTok nuk përshtatej me “modelin e gjërave sociale” të tij dhe dukej më shumë si një version më i shkurtër i YouTube. Sot, ai thotë se është e rëndësishme që Meta të krijojë një algoritëm që do t’u rekomandojë përdoruesve përmbajtje të ndryshme argëtuese, por ndryshe nga TikTok, ai nuk dëshiron të fokusohet vetëm në video, por edhe në foto dhe përmbajtje teksti.

“Ndonjëherë dua vetëm të shikoj video, por shpesh dua vetëm gjërat më të mira,” shpjegoi ai në një intervistë për “Stratechery”.