Maqedonci uron SHBA-në për Ditën e Pavarësisë: Një burim frymëzimi për kombet anembanë botës

Me rastin e 249-vjetorit të Pavarësisë së Shteteve të Bashkuara të Amerikës, Ministri i Mbrojtjes së Kosovës, Ejup Maqedonci, ka përcjellë një mesazh urimi për popullin dhe institucionet amerikane, duke theksuar vlerat që SHBA-ja përfaqëson dhe marrëdhënien e fortë mes dy vendeve.

“Kam kënaqësinë t’i përcjell popullit, institucioneve dhe në veçanti Departamentit të Mbrojtjes dhe Forcave të Armatosura të Shteteve të Bashkuara të Amerikës, urimet më të përzemërta dhe të sinqerta për këtë ditë të shënuar,” deklaroi Maqedonci.

Ai vlerësoi rolin historik të SHBA-së në promovimin e lirive dhe të drejtave themelore.

“Ky përvjetor është një dëshmi e qëndrueshmërisë së vlerave të lirisë, demokracisë dhe të drejtave të njeriut, që Shtetet e Bashkuara kanë mbrojtur dhe promovuar ndër shekuj, duke qenë një burim frymëzimi për kombet anembanë botës.”

Maqedonci shprehu gjithashtu mirënjohjen për miqësinë e qëndrueshme mes dy vendeve dhe shprehu optimizëm për të ardhmen.

“Duke e vlerësuar lart marrëdhënien miqësore dhe bashkëpunimin e thellë mes vendeve tona, shpreh bindjen se këto lidhje do të vazhdojnë të thellohen dhe të kontribuojnë për paqen, sigurinë dhe mirëqenien tonë të përbashkët.”

Në fund, ministri uroi popullin amerikan për shëndet dhe prosperitet.

“Uroj shëndet, mbarësi dhe përparim të mëtejshëm për popullin mik të Shteteve të Bashkuara të Amerikës.”.