Malaj në inaugurimin e Muzeut në Krushë të Madhe: Deklaratë e angazhimit kolektiv për të vërtetën

Ambasadori i Republikës së Shqipërisë në Kosovë, Petrit Malaj, në inaugurimin e Muzeut të Masakrës së Krushës së Madhe të Rahovecit, tha se ky nuk është vetëm një akt kujtimi, por një deklaratë e guximshme e angazhimit kolektiv për të vërtetën, për drejtësinë e për pajtimin.

“Duke respektuar të kaluarën hapim një të ardhme”, u shpreh ambasadori shqiptar.

“Ne këtu jemi mbledhur nën hijen e një historie të zymtë, në një ditë të shënuar nga pikëllimi dhe respekti i thellë. Sot këtu përurohet një muze kushtuar kujtimit të masakrës në Krushë, një tragjedie të papërshkrueshme”, tha më tej Malaj.