Macron bën thirrje për armëpushim të menjëhershëm në Ukrainë në bisedë me Putinin

Presidenti francez, Emmanuel Macron, ka bërë thirrje për një armëpushim të menjëhershëm në Ukrainë në një telefonatë me presidentin rus, Vladimir Putin.

Duke cituar një zëdhënës të qeverisë gjermane, Reuters raporton se telefonata 75-minutëshe përfshinte Putinin, Macron dhe kancelarin gjerman, Olaf Scholz.

Gjatë telefonatës, Putin i informoi ata për bisedimet midis Rusisë dhe Ukrainës, tha Kremlini për agjencinë e lajmeve.

Kujtojmë se deri tani janë mbajtur tre palë runde të bisedimeve mes përfaqësuesve të Ukrainës dhe Rusisë por nuk është arritur ndonjë marrëveshje që do të ndalte luftën atje.

Rusia ka nisur pushtimin e paprovokuar të Ukrainës më 24 shkurt. Presidenti rus, Vladimir Putin, e ka cilësuar si “operacion special”. Perëndimi e ka dënuar ashpër pushtimin dhe ka vendosur një varg sanksionesh të rënda kundër Rusisë.