Kryetari i Lidhjes Demokratike të Kosovës (LDK), Lumir Abdixhiku, ka bërë një reagim pas dënimit të Zoran Vukotiq me 10 vite burg për përdhunimin e një gruaje përgjatë luftës së fundit në Kosovë.
Abdixhiku, me anë të një postimi në ‘Facebook’, ka thënë se megjithatë, edhe drejtësia e vonuar është drejtësi, derisa ka pasur edhe disa fjalë për prokurorinë, shkruan Gazeta Express.
“Zoran Vukotiq është i dënuari i parë në Kosovë për dhunim seksual të një gruaje shqiptare. 10 vjet burg nuk zhbëjnë vuajtjet sistematike të grave e burrave shqiptarë; porse mbesin shenjë e obligimit tonë shoqëror e historik për dëshmim të krimit si krim”, ka deklaruar ai.
“Dënimi i sotëm duhet t’i shërbejë prokurorisë si motiv për t’i sjellë para drejtësisë secilin kriminel që sot mbetet i lirë; e këtyre të fundit për t’u bërë të qartë që një ditë – megjithatë – dora e drejtësisë së Republikës së Kosovës do t’i gjejë”, ka thënë ndër të tjera ai.