Liverpooli nderon Diogo Jotën pas vdekjes tragjike – familja e tij do të marrë të plotë kontratën deri në vitin 2027

Bota e futbollit vazhdon të jetë e tronditur nga humbja tragjike e Diogo Jotës dhe vëllait të tij, Andre Silva, të cilët humbën jetën në një aksident trafiku të enjten.

Ceremonia mortore u mbajt të shtunën në mëngjes në qytetin e tyre të lindjes, Gondomar, ku Liverpooli dërgoi një delegacion të përbërë nga drejtues të klubit, lojtarë dhe trajnerë për t’i bërë homazhe.

Mes lojtarëve të pranishëm ishin Virgil van Dijk, Andrew Robertson dhe Alexis Mac Allister, të cilët udhëtuan drejt Portugalisë për të qëndruar pranë familjes së Jotës në këtë moment të vështirë. Ndërkohë, mijëra tifozë u mblodhën jashtë stadiumit “Anfield” për të nderuar kujtimin e sulmuesit me lule, shalle dhe mesazhe prekëse.

Sipas medias portugeze Record, klubi i Liverpoolit ka marrë një vendim prekës: do ta nderojë tërësisht kontratën e Jotës, duke ia paguar të plotë familjes së tij deri në vitin 2027. Vendimi është marrë nga pronarët e klubit, Fenway Sports Group (FSG), për të siguruar mbështetje financiare për bashkëshorten e tij, Rute Cardoso, dhe tre fëmijët e tyre.

Ky veprim njerëzor vjen si një dëshmi e vlerësimit të thellë që klubi ka për Jotën, duke nderuar trashëgiminë e tij jo vetëm në fushë, por edhe jashtë saj.