Liverpool deklason Tottenhamin dhe shpallet kampion i Anglisë

Në javën e 34-të të Premierligës, Liverpooli tregoi forcën e tij të pakontestueshme duke mposhtur Tottenhamin me rezultat të thellë 5:1 në “Anfield”, dhe njëkohësisht siguroi matematikisht titullin e kampionit të Anglisë për sezonin 2024/25.

Ndeshja nisi me një surprizë të vogël kur në minutën e 12-të, Dominic Solanke kaloi Tottenhamin në epërsi. Megjithatë, reagimi i “The Reds” ishte i menjëhershëm dhe shkatërrues. Vetëm katër minuta më vonë, Luis Díaz barazoi shifrat në 1:1, duke rikthyer qetësinë në radhët e tifozëve vendas.

Liverpooli vazhdoi të dominojë ndeshjen, dhe në minutën e 24-t, Alexis Mac Allister shënoi për 2:1. Festa u vazhdua edhe më fuqishëm në minutën e 34-t kur Cody Gakpo realizoi golin e tretë, duke e bërë të qartë se Liverpooli nuk kishte ndërmend të ndalej.

Në pjesën e dytë, Mohamed Salah, shënoi golin e katërt në minutën e 63-të. Vetëm gjashtë minuta më vonë, Destiny Udogie shënoi një autogol të pafat, duke vulosur rezultatin përfundimtar 5:1 në favor të Liverpoolit.

Me këtë fitore, Liverpooli arrin në kuotën e 82 pikëve, duke siguruar titullin kampion katër javë para fundit të sezonit. Ndërkohë, Tottenham vazhdon krizën e rezultateve dhe ndodhet në pozitën e 16-të me vetëm 47 pikë, duke rrezikuar një përfundim zhgënjyes të sezonit.

Ky është titulli i 20-të kampion në histori për Liverpoolin, një sukses i jashtëzakonshëm që vjen pas një sezoni dominues në Premier League.