Lipjan: 34-vjeçari shantazhon 15-vjeçaren me të cilën ishin në lidhje dashurie, e kërcënon për të kryer marrëdhënie seksuale

Dje, në  qendër të qytetit në Lipjan, mbrapa një parkingu, një  vajzë e mitur ka kërkuar dje ndihmën e Policisë. Bëhet fjalë një 15-vjeçare e cila u përballë me  një rast të ngacmimit seksual dhe kërcënimit nga një 34-vjeçar.

Burimet e Sinjalit brenda Prokurorisë thonë se rasti dyshohet të ketë ndodhur pas refuzimit të të miturës për të vazhduar lidhjen e dashurisë me të dyshuarin. I mllefosur, ky i fundit po dyshohet se e ka shantazhuar dhe kërcënuar vajzën për të qenë në lidhje.

Sipas informatave të para, gati një vit më parë ata kishin nisur lidhjen dhe gjatë asaj kohe, i dyshuari në vazhdimësi i kishte kërkuar 15-vjeçares të kryejnë marrëdhënie seksuale, duke e kërcënuar.

Të gjitha këto detaje u zbuluan pasi e mitura u intervistua nga hetuesit policorë dhe nisën hetimet për rastin.

Ndaj të dyshuarit, Prokurori i Shtetit ka urdhëruar që të iniciohet rasti për ngacmim seksual dhe për kanosje.