Lindja e parakohshme: Rreziqet dhe faktorët e rrezikut

Lindja e parakohshme ndodh kur një foshnjë lind para javës së 37-të të shtatzënisë. Foshnjat që lindin para kohe mund të kenë rrezik më të lartë për disa probleme shëndetësore sesa foshnjat që lindin në kohën e duhur.

Në Shtetet e Bashkuara, rreth 1 në 10 foshnja lind para kohe. Në varësi të asaj se sa herët ndodh lindja, foshnja mund të ketë vështirësi në frymëmarrje, tretje dhe zhvillimin e trurit, shkruan burimi Very Well Health. Mjekët matin zhvillimin e shtatzënisë në javë. Një shtatzëni e plotë zgjat 40 javë. Lindja para javës së 37-të konsiderohet si e parakohshme.

Foshnjat e lindura para kohe mund të përballen me rreziqe të shumta shëndetësore, të cilat zakonisht shtohen sa më herët të ndodhë lindja. Disa nga këto përfshijnë:

Sindroma e vështirësisë në frymëmarrje: Kur mushkëritë janë të papjekura dhe nuk kanë surfaktant (lëngu që hap mushkëritë pas lindjes).

Apnea: Kur foshnja ndalon së marrë frymë për më shumë se 15 sekonda, shpesh duke shkaktuar ulje të rrahjeve të zemrës (bradikardi).

Anemia: Mungesë e qelizave të kuqe që transportojnë oksigjenin në trup.

Infeksione: Për shkak të sistemit imunitar të pazhvilluar, duke përfshirë rrezik për sepsë.

Hemorragji intraventrikulare: Gjakderdhje në hapësirat e mbushura me lëng në tru.

Verdhëza: Ngjyrosje e verdhë e lëkurës dhe syve për shkak të bilirubinës së lartë.

Enterokoliti nekrotizues: Dëmtime serioze në indet e zorrëve që mund të çojnë në vdekje të tyre.

Duktusi arterioz i hapur: Një enë gjaku në zemër që nuk mbyllet pas lindjes.

Retinopatia e parakohshme: Sytë nuk zhvillohen plotësisht.

Shkaku i lindjes së parakohshme shpesh mbetet i panjohur, por disa faktorë rreziku mund të ndikojnë. Nëse një grua shtatzënë ka ndonjë nga këto kushte, rreziku i lindjes së parakohshme rritet me:

Diabetin.

Tensioni i lartë i gjakut.

Sëmundjet e zemrës.

Probleme me veshkat.

Infeksione në membranat amniotike, vaginë ose traktin urinar.

Placenta previa (placenta e pozicionuar poshtë në mitër).

Shkëputje e placentës nga mitra.

Peshë e ulët trupore ose shtim jo i mjaftueshëm në peshë.

Faktorë të tjerë rreziku për lindje të parakohshme përfshijnë:

Infeksionet seksualisht të transmetueshme (IST).

Probleme me koagulimin e gjakut.

Mosha (nën 18 vjeç ose mbi 35 vjeç).

Shtatzëni multiple (binjakë, trinjakë etj.).

Stres, punë me orar të zgjatur.

Mungesë mbështetjeje sociale.

Dhunë në familje.

Ekspozimi ndaj ndotësve.

Përdorimi i duhanit ose substancave narkotike.

Nëse jeni shtatzënë, mund të mos e dini saktësisht si ndihen shenjat e lindjes. Kontaktoni menjëherë mjekun nëse përjetoni ndonjë nga simptomat e mëposhtme para javës së 37-të:

Kontraksione: Barku shtrëngohet në intervale të rregullta.

Rrjedhje vaginale: Lëng ose gjak që del nga vagina.

Presion në legen: Ndjesi sikur koka e foshnjës po shtyn poshtë.

Dhimbje mesi: Dhimbje e butë në pjesën e poshtme të shpinës.

Ngërçe në bark: Me ose pa diarre.