Ligji i Pagave përplot me pakënaqësi, reagon edhe Sindikata e Administratës së Gjykatës në Prishtinë

Ligji i Pagave në sektorin publik ka shfaqur pakënaqësi të shumta.

Pagat e pranuara për muajin shkurt ka bërë që zyrtarët publikë të kenë reagime të shumta ndaj “uljes” së pagave, e jo ngritjes siç pritnin këta të fundit.

Në lidhje me këtë reagim pati edhe nga Shoqata Sindikale e Administratës së Gjykatës Themelore në Prishtinë.

Shoqata Sindikale e Administratës së Gjykatës Themelore në Prishtinë raporton se është duke e përcjellë dhe analizuar situatën me paga për punëtorët e administratës së gjykatave dhe shpreh shqetësimet e saja lidhur me klasifikimet dhe gradimet sipas koeficienteve të përcaktuara nga ana e Qeverisë së Republikës së Kosovës, Ministrisë së Punëve të Brendshme dhe Ministrisë së Financave dhe Transfereve, pasi siç thuhet në reagim, shumë pozita të të punësuarve në administratat e gjykatave kanë pësuar degradim në pozita për koeficiente si dhe ulje të pagave në disa pozita.

“Sindikata në vazhdim do i ndërmerr të gjitha veprimet ligjore duke kërkuar nga institucionet relevante për t’i rishikuar gradimet dhe koeficientet e përcaktuar sepse jo që nuk kemi arritur paga të dinjitetshme siç pretendon Qeveria e Kosovës, po kemi pësuar ulje të pagave në disa pozita”, deklaron Naim Rrustemi, kryetar i Shoqatës Sindikale te Administratës se Gjykatës Themelore në Prishtinë me Degët e saja në Podujevë, Drenas, Lipjan dhe Graçanicë.