Liderët e Ballkanit Perëndimor pritet të nënshkruajnë tre marrëveshje në Berlin

Liderët e Ballkanit Perëndimor pritet të nënshkruajnë sot në Berlin tre marrëveshje – për lirinë e lëvizjes me kartë identiteti, për njohjen e kualifikimeve të arsimit të lartë dhe për njohjen e kualifikimeve profesionale të mjekëve, stomatologëve dhe arkitektëve.

Krerët e qeverive të Serbisë, Kosovës, Malit të Zi, Maqedonisë së Veriut, Shqipërisë dhe Bosnjë-Hercegovinës do të nënshkruajnë marrëveshje rajonale në samitin e Ballkanit Perëndimor si pjesë e procesit të Berlinit.

Të tre marrëveshjet u miratuan nga ministrat e jashtëm të gjashtë vendeve të Ballkanit Perëndimor në një takim të organizuar nga qeveria gjermane më 21 tetor.

Samiti do të hapet nga kancelari gjerman Olaf Scholz dhe temat kryesore të diskutimit do të jenë e ardhmja e Procesit të Berlinit dhe Tregut të Përbashkët Rajonal, si dhe siguria energjetike dhe tranzicioni.

Seancat e punës do të pasohen me ceremoninë e nënshkrimit të tri marrëveshjeve, më pas me takime me përfaqësues të Forumit Rinor dhe Shoqërisë Civile.

Në fund të samitit do të mbahet një konferencë e përbashkët për shtyp nga kancelarja gjermane, kryeministri i vendit që do të jetë nikoqir i samitit të ardhshëm të procesit të Berlinit dhe presidentja e Komisionit Evropian, Ursula von der Leyen.

Procesi i Berlinit është një format i takimeve vjetore që qeveria gjermane, gjatë kohës së kancelares Angela Merkel, e inicioi në vitin 2014 kur u mbajt Konferenca për Ballkanin Perëndimor në Berlin.

Qëllimi i procesit është përshpejtimi i bashkëpunimit të gjashtë vendeve të Ballkanit Perëndimor dhe integrimi i këtij rajoni në BE. Nisma fokusohet kryesisht në zgjidhjen e problemeve dypalëshe dhe të brendshme në rajon dhe përmirësimin e bashkëpunimit ekonomik, i cili do të ishte baza e zhvillimit të qëndrueshëm të rajonit.